The skin care routine

مرحبا كيفكم شخباركم
وحشتني مدونتي حبيبتي
انشغلت بالاختبارات
المهم

اليوم ان شاء الله بتكلم عن روتين العناية بالبشره

زي ماقلتلكم اول حنبداء سلسلة عنايه وبحاول  ان شاءالله اغطي الموضوع كله

لان طرق العنايه وانواعها كثيره ومتنوعه

  روتين العنايه

العنايه بالبشره ضروريه جدا لانها
تساعدك تحمي بشرتك من العوامل الخارجيه الي بتضرها وكمان

تساعدك  بتخفيف علامات التقدم بالسن انو ماتظهر بسرعه على بشرتك لتتمتعي ببشره مشرقه وشابه

افضل وقت

اول ماتصحي  من النوم هوا افضل وقت لان جميع مسام البشره يكون مفتوح

تقدري تنظفيها تمام اهم شي ماتستخدمي صابون عادي اواي مادة ممكن تضر البشره  

خطوات العنايه

اول خطوة حتكون الغسول طبعا لما تروحي الصيدلية او السوبرماركت حتلااقي انواااااع واصناف منها

اهم شي في  هذ الخطوة تختاري المناسب لبشرتك
وهنا حقولك انواع البشره والمناسب لها
حيساعدك في الاختيار ان شاءالله  

انواع البشره

البشره الجافه : هذا النوع بيكون نسبة  انتاج الدهون مرا منخفضه  بيكون مظهرها الخارجي خشن وتبين عليها بعض القشور  افضل تختاري الغسول الكريمي لانوا حينظف بشرتك و حيساعدك على ترطيبها يعني ماتحسي بعد ماتغسلي انها جافه وناشفه

البشره الدهنية : هي البشره تكون لامعة ذات مسامات واسعة اكثر الانواع معرضه للحبوب اذا كانت بشرتك دهنيه لازم تعتني فيها اكثر وبشكل منظتم الغسول الي يناسبك هوا الي يكون مطهر ومضاد للبكتيريا حيفيدك كثير
ملاحظه مرا مهمه

طبعا هذا مايعني ماتستخدمي كريمات الترطيب  لان بشرتك دهنيه بالعكس تستخدمي كريم ترطيبه خفيف او متوسط كمان ممكن ماتستخدميه كل يوم

  البشره المختلطه :هذي البشره بتكون منطقة T-Zone دهنيه اللي هيا (الجبين _الخشم _الدقن )وباقي البشره عادي او جاف طبعا صعب تستخدي غسول للمنطقة الدهنيه وغسول للجافه فالافضل تستخدم الغسول الي يكون قوامه جل لانوا تنظيفه عميق مع حمايه من الجفاف

البشره الحساسه : الافضل تستخدمي منتجات طبيه حتى تكون خاليه من العطور او الكحول الي ممكن تهيج وتسبب لك مشاكل

  التونر (قابض للمسام )

هوا منتج سائل في منه انواع كثير نستخدموا مع القطنه ونمسح فيه على البشره الخطوه هذي مررررا مهمه بعد التنظيف في بنات مايهتموا فيها بالعكس لازم تحرصي عليه لان بعد التنظيف تكون مسام البشره مفتوح ولازم تتقفل التونك بيقوم بهذي المهمه ويقفلك مسام بشرتك لحامايتها لان اذا اهملتي هذي المرحله يرجع يتجمع الوسخ على البشره مرا ثانيه

المقــشـر

فايدة المقشر يزيل خلايا الجلد الميت من على البشره  ويحافظ على نظارة بشرتك لانوا يزيل اثار الاتربه والاوساخ المتراكمه على البشره . الخطوه مرا مهمه دايم بنسمع من اخصائي البشره بينصحوا  بستعمال المقشر المناسب ,طبعا افضل انو يستخدم مرتين الى ثلاث مرات في الاسبوع في بنات يستخدموا يوميا هذا مرا غلط لان بنزيد حساسيه البشره لللعوامل الخارجيه حتى لو كان المقشر خفيف من الافضل مايستخدم يوميا

كريم الواقي من الشمس
بحكم جونا الي دااااااااايم مشمس والتعرض المستمر لشمس يضر البشره ويسبب ظهور لعلامات التقدم بالسن
بذات بنات الجامعه والمشي الطويل بالشمس يحتاجوا الواقي مررررا مهم معدل الحمايه SPF  مايقل عن 15 لان اقل من كذا ماحيفيد البشره مع العلم انو 15 اقل شي اتوقع انا عن نفس اقل شي ممكن استخدموا 30  لان مااتعرض لشمس كثير وموجود بمعدل اكبر ال50 الي يحتاجوا تغطيه اقوا


طبعا هذي اهم الامور الي تساعدك تحافظي على صحة ونضارة بشرتك كمان في شي مرا مهم في بنات الله يهديهم يهملوا يمسحوا المكياج قبل مايناموا مرا الشي هذا غلط  وظلم بحق بشرتك لازم نتاكد من نظافة البشره  وخلوها من مساحيق التجميل لان الاساس ومواد المكياج تسد المسام والبشره محتاجه تتنفس  اكثر شي نستهون فيه الكحل والمسكارا مررره مضرين للعين بتسبب ضرر انتبهوا على هذي النقطه وبس
 هذا كل الي عندي اتمنى تستفيدوا وتتمتعوا ببشره صحيه ونضره عل طووووول
اشوفكم التدوينه الجايه
باااي